Ракометниот клуб Охрид продолжува со силни потези во пресрет на продолжението од сезоната. Ново име во составот е македонскиот репрезентативец Томислав Јагуриновски, кој по кратка авантура во Германија реши повторно да настапува во домашниот шампионат.
Десниот бек, кој летово се пресели во германскиот Десау, по спогодбен раскин на договорот се враќа во Македонија и ќе го засили тимот од градот покрај Охридското Езеро.
Јагуриновски веќе се приклучи на подготовките и беше присутен на натпреварите на својот нов клуб во ЕХФ Купот изминатиот викенд.
Во текот на кариерата, 27-годишниот ракометар остави силен печат настапувајќи за Металург, Вардар, Еурофарм Работник, Пелистер, како и за исландскиот Акурејри. Со своето искуство и енергичен стил на игра, тој треба да донесе стабилност и дополнителна димензија во нападот на охридскиот тим.
Потписот на Јагуриновски доаѓа само ден по потврденото ангажирање на Младен Крсманчиќ, што уште еднаш го потврдува јасниот стремеж на клубот – Охрид да биде меѓу водечките сили во македонската Суперлига.
