Фудбалско славје го очекува прилепското село Големо Коњари! Новиот второлигаш ќе има чест и привилегија во четврток (16 октомври) да го угости најтрофејниот македонски клуб – Вардар, во рамки на пријателски натпревар кој ќе започне во 15 часот.
Дуелот ќе се одигра на фудбалскиот терен во Големо Коњари и претставува вистински празник за љубителите на фудбалот во овој регион. Селото, кое живее за својот клуб, со нетрпение го очекува гостувањето на „црвено-црните“, а атмосферата се очекува да биде празнична, со голем број гледачи покрај теренот.
Вардар, под водство на Гоце Седлоски, продолжува со практиката да одигрува контролни натпревари со екипи од понизок ранг, во рамки на подготовките и проверките на составот. Претходно, македонскиот гигант одигра пријателски средби со третолигашите Карбинци, со Овче Поле во Свети Николе и Рудар во Пробиштип, а сега следи нова провера – овојпат со амбициозниот второлигаш од прилепско.
Посебна е симболиката на овој меч – тренерот на Вардар, Гоце Седлоски, потекнува токму од Големо Коњари. Неговото враќање на домашниот терен, овојпат во улога на стратег на најтрофејниот клуб во земјата, ќе биде момент исполнет со емоции и спомени за локалното население.
Натпреварот меѓу Големо Коњари и Вардар ќе биде многу повеќе од обична пријателска средба – тоа ќе биде ден кога фудбалот повторно ќе ги обедини генерациите, а малото село ќе биде во центарот на спортската мапа на Македонија.
