Искусната фудбалерка Мила Талевска се врати на зелениот терен и повторно го облече дресот на ЖФК Конзули од Битола. Иако само пред неколку месеци најави крај на активната кариера и посветување на тренерската работа, 26-годишната фудбалерка реши повторно да го почувствува натпреварувачкиот адреналин и да помогне на својот поранешен клуб.
Откако ЖФК Конзули се реактивираше и реши да се врати на фудбалската карта на Македонија со амбиција за враќање во Првата женска фудбалска лига, Талевска одлучи повторно да го облече дресот, овојпат и со капитенската лента на раката. Со нејзиното искуство и лидерство, тимот од Битола блеска во Втората лига и се движи сигурно кон пласман во елитата, при тоа без пораз во тековната сезона.
- Богата кариера низ македонскиот женски фудбал
Битолчанката Талевска својата кариера ја започна во ЖФК Топ Гол во февруари 2013 година, каде настапуваше до февруари 2015. Потоа премина во ЖФК Конзули, каде што остана до август 2016 година. Следуваше нова авантура во редовите на ЖФК Атлетико, каде што го носеше дресот од август 2016 до јуни 2018 година.
Од јули 2018 до август 2023 година, Талевска настапуваше за ЖФК Каменица Саса, еден од најуспешните женски фудбалски клубови во земјата, каде што остави длабока трага со својата сигурност, зрелост и борбеност. По пет успешни години во Македонска Каменица, таа се врати во родната Битола, повторно во дресот на Атлетико, каде што настапуваше до август 2025 година.
Иако најави дека ќе стави крај на кариерата и ќе се насочи кон тренерството, љубовта кон фудбалот сепак надвладеа – и Талевска се врати таму каде што најмногу ѝ припаѓа – на теренот.
- Капитен, лидер и инспирација
Како поранешна репрезентативка на Македонија, Мила Талевска ја користи својата улога не само за да го предводи тимот кон успех, туку и за да биде пример за младите фудбалерки. Таа досега постигна четири погодоци за Конзули во новата сезона и е меѓу најзаслужните за резултатската доминација на тимот.
Со нејзиното враќање, битолскиот клуб доби вистински лидер на теренот и во соблекувалната – личност која со својот став, искуство и љубов кон играта ја симболизира страста кон женскиот фудбал во Македонија.
