По убедливиот двомеч со азербејџанскиот Баки, викендов, ракометарите на ГРК Охрид обезбедија пласман во третото коло од ЕХФ Европскиот Куп.
Со доминантна игра на двата натпревари и висока победа на домашен терен, охриѓани ја потврдија својата класа и покажаа дека тимската хемија и дисциплината се нивната најголема сила.
Голманот Даниел Ѓорѓески, еден од најискусните и најстабилните во редовите на „гладијаторите“, по завршувањето на двомечот ги сподели своите впечатоци:
- Како би го сумирал двомечот со Баки — што, според тебе, го одлучи победникот?
,, Одигравме два квалитетни натпревари против екипата на Баки од Азербејџан, особено првиот натпревар, каде што го решивме пласманот во следната фаза, и докажавме и на терен дека сме доста поквалитетни и сакам да им честитам на момците за пласманот во следната рунда од Европскиот Куп. “
- Каква беше атмосферата на теренот и во тимот во текот на натпреварите?
,, Атмосферата и во тимот, а и во текот на натпреварите беше одлична. Навистина уживавме во овие два меча од европски карактер, и искрено се надевам дека вака и ќе продолжиме понатаму. “
- Колку овој настап во ЕХФ Европскиот Куп ќе му помогне на тимот во натамошниот развој и самодоверба?
,, Сметам дека овој настап во Европскиот Куп е исклучително важен за нас и дека многу ќе ни помогне за подигнување на самодовербата и искуството во вакви натпревари. Исто така, на реваншот, и нашите младинци го почувствуваа теренот на еден натпревар од европско значење за нас, а тоа е исто така значајно. “
- Какви се целите и амбициите на клубот во европските натпреварувања оваа сезона?
,, Целите и амбициите на клубот оваа сезона се големи – како во Европскиот Куп, така и во домашното првенство..така што сакаме да се пласираме што е можно повисоко, па зошто и да не го освоиме ова натпреварување. “
- На вториот натпревар можност да брани доби и вашиот помлад колега, Бојан Крстевски, кој постојано го бодревте од клупата. Тој, во своето деби, се закити со неколку одлични интервенции. Што би го советувал како поискусен голман во тимот?
,, Одлично е што на вакви натпревари можат да добијат шанса и нашите младинци. Тие секогаш ја имаат нашата поддршка, и мислам дека одлично си ја искористија својата шанса, особено мојот помлад колега – Бојан Крстевски. Би му порачал само да продолжи напорно да работи и мислам дека му претстои одлична иднина. “
Со оваа двојна победа над Баки, ГРК Охрид ја заокружува втората рунда во Европскиот Куп на импресивен начин, покажувајќи зрелост, ширина во ростерот и нова генерација што расте зад поискусните играчи.
Тимот на Борис Ројевиќ ја потврди формата и амбицијата да оди чекор понапред, а пласманот во третото коло е уште еден доказ дека „гладијаторите“ се подготвени за нови европски предизвици.
