Македонското борење изгуби една од своите најголеми фигури. На 52-годишна возраст, во саботата на 11 октомври 2025 година, почина Гари Модојсан, еден од највпечатливите борци што оставија длабока трага во овој спорт.
Модојсан беше долгогодишен член на Борачкиот клуб „Бучим – Јака“ од Радовиш, каде беше дел од златната генерација која во 1995 година стана Европски клупски шампион, а две години подоцна настапи и во Купот на европските шампиони.
Во својата кариера го носеше дресот на државната репрезентација на Македонија во периодот од 1996 до 1999 година, а токму во 1996 година ја доби и престижната спортска награда „Македонски бисер“, признание кое се доделува на врвни спортисти кои ја афирмираат Македонија на меѓународната сцена.
По завршувањето на активната кариера, Модојсан остана посветен на борењето – од 2010 до 2013 година го предводеше Борачкиот клуб „Бучим“ како тренер, а во исто време ја извршуваше и функцијата селектор на македонската репрезентација, несебично пренесувајќи го своето искуство на младите генерации.
Со неговото заминување, македонскиот спорт изгуби не само врвен борач, туку и човек кој целиот свој живот го посвети на развојот и унапредувањето на борењето во земјава.
