Ракометарите на Охрид со уште една сигурна партија го заверија пласманот во третата рунда од ЕХФ Европскиот Куп. По вчерашниот триумф, охридскиот тим повторно беше неприкосновен и по вторпат, пред својата публика го совлада Баки со убедливи 38-21.
Стратегот, Борис Ројевиќ, им даде шанса на неколку млади ракометари од сопствената школа, кои целосно ја оправдаа довербата. Меѓу нив беа голманот Бојан Крстевски, бекот Илија Трајчески и крилото Христијан Пупунцоски, кои со својата енергија внесоа свежина во тимот.
Младиот голман на ГРК Охрид, Бојан Крстевски, го имаше своето европско деби во натпреварот против Баки, кој охридскиот тим го доби со убедливи 38-21, осигурувајќи пласман во третото коло од ЕХФ Европскиот Куп.
Крстевски доби шанса од стратегот Борис Ројевиќ и ја искористи на најдобар можен начин, забележувајќи седум одбрани и 44% успешност, што му донесе одлични реакции од публиката и голема поддршка од соиграчите. За него, ова беше натпревар што ќе го памети цел живот.
Во изјава за Спортска Мрежа по натпреварот, Крстевски истакна:
„Најпрво, денес ми се исполни мојот сон, бидејќи отсекогаш сум сакал да заиграм во натпревар за Европа и благодарам за укажаната можност, денес да го искусам тоа. Ова можеби не беше меч кој беше резултатски важен за нас, меѓутоа е момент за мене што ќе го паметам во текот на целата моја кариера. Во моето деби, сметам дека имав добри интервенции, но сепак треба да се тренира сѐ повеќе и повеќе, за да биде сѐ подобро, па ако можеме, зошто да не стигнеме и до финале.“- изјави младиот голман.
Со вакви настапи, младиот охридски голман најавува дека иднината на охридската ракометна школа е сигурна – и дека на клубот му доаѓа нова генерација која знае како да се носи со европските предизвици.
