Нов кикс на Овче Поле – прв бод за Светлост, Ударник пресилен за Рудар, Дојчинов херој во Делчево!

Ударник ја забележа најубедливата победа во рамки на 6. коло на Трета лига – Исток, откако на домашниот терен во Пирава со 3:0 го декласираше составот на Рудар од Пробиштип.

Домаќинот преку Јовче Крстев дојде во водство од 1:0 во 18. минута од мечот, а со тој резултат заврши и првиот дел од средбата. Во второто полувреме Трајче Бошков во 68. минута беше прецизен за 2:0, а по три минути игра Крсте Тодоров ги постави конечните 3:0.

Нов кикс за тимот на Овче Поле откако одигра 1:1 на гостувањето во Зрновци кај последнопласираниот Светлост, а за домаќинот ова е прв сезонски бод.

Павел Русевски го отвори резултатот во 23. минута. Гостинот од Свети Николе бараше можност за втор погодок, но не успеваше во таа намера, а пак домаќинот преку Илија Шуманов во 81. минута ги постави конечни 1:1.

Главниот судија Борче Коцев имаше доста работа бидејќи додели четири жолти картони кај домашниот тим, а пак кај гостинскиот тим додели пет жолти картони на играчите, а жолт картон му покажа и на тренерот Јорданчо Трендафилов.

Јован Дојчинов одново е херој за Брегалница Делчево, откако постигна погодок во 96. минута за бод на неговиот тим кој ремизираше со Хоризонт Турново 2:2.

По чистите мрежи во првиот дел, во второто полувреме беа постигнати четири погодоци, а Дојчинов го отвори резултатот за водство на Брегалница во 56. минута од 1:0. По осум минути игра Горан Стојанов погоди за 1:1, а пак искусниот Дејан Блажевски во 83. минута погоди за 1:2 и водство на тимот од Турново.

Во 88. минута судијата Тоше Џамов покажа црвени картони капитените на двете екипи односно Дарко Пешовски кај Брегалница и Наум Блажевски кај гостинот за неспортско однесување.

Во судиското надополнување одново Дојчинов се покажа херој за Брегалница и со погодок донесе бод за неговиот тим откако ги постави конечните 2:2.

Екипата на Карбинци со двата погодоци на Марио Атанасовски дојде до триумф над Малеш од Берово со резултат од 2:1.

Домаќинот двата погодоци ги постигна во првиот дел, а во второто полувреме поточно во 66. минута Матеј Милчовски ги постави конечните 2:1.

Одложениот меч меѓу Победа Валандово и Дојранско Езеро ќе се одигра во друг термин, а истиот е одложен на барање на гостинскиот тим до Дојран. Во рамки на 6. коло слободна беше екипата на Тиверија од Струмица.