Фудбалскиот клуб Пелистер оваа година слави впечатлив јубилеј – 80 години постоење, а големата прослава ќе биде збогатена со пријателски натпревар против еден од најпознатите клубови од Романија – Динамо Букурешт.
Натпреварот е закажан за 12 октомври (недела) на стадионот „Петар Милошевски“ во Битола, со почеток од 17:30 часот, и ќе се одигра под рефлектори. Настанот ќе биде вистински празник на битолскиот спорт, со богата спортска и културна програма во чест на долготрајната зелено-бела традиција.
Романскиот гигант Динамо Букурешт, клуб со богата историја и традиција, има освоено 18 шампионски титули и 13 Купови на Романија, а во минатото настапувале многу познати имиња од европскиот фудбал. Меѓу нив беше и Мирко Ивановски, сегашниот капитен на Пелистер, кој во својата кариера носеше токму дрес на Динамо.
Прославата ќе биде уште поспецијална затоа што најверната навивачка група Чкембари ќе одбележи 40 години постоење, подготвувајќи вистински спектакл на трибините. Очекувањата се дека Битола ќе живее во зелено-бели бои, во еден од најемотивните моменти во поновата историја на клубот.
