Струмица повторно беше сведок на емотивен и величествен момент во чест на клупската историја и фудбалската традиција. Фудбалскиот клуб Беласица им оддаде признание на своите живи легенди Милан Василев и Ристо Панов, двајца играчи кои со својата посветеност, верност и љубов кон клубот оставија длабока трага во струмичкиот фудбал.
Во свечена атмосфера пред почетокот на натпреварот, претседателот на клубот Славчо Васков – Пинда им врачи плакети и врамени дресови со нивните имиња и бројот на настапи, како симбол на благодарност за годините поминати во дресот на „сините“. Публиката на стадионот во Струмица со громогласни овации ги поздрави легендарните Василев и Панов, кои се меѓу најдобрите по број на настапи во историјата на клубот.
Милан Василев одигра 383 натпревари во 14 сезони за Беласица, постигна 69 погодоци и во три наврати беше најдобар стрелец на тимот. Неговите топовски удари и борбен дух го направија еден од најпрепознатливите играчи во историјата на клубот.
Ристо Панов, пак, е вистински симбол на одбраната и лидер на теренот. Во дресот на Беласица одигра 366 натпревари во 15 сезони, постигнувајќи 21 погодок. Со својата сигурност и лидерство, беше столб на шампионската генерација која ја освои титулата во Македонската лига во сезоната 1982/83.
Беласица со оваа гест продолжува со својата традиција на оддавање признание на клупските легенди, која започна неодамна кога слично признание доби и Петар Андреев, апсолутниот рекордер по број на настапи – 555 натпревари во 22 сезони и 50 постигнати погодоци.
Со вакви моменти, струмичкиот клуб покажува дека ја цени својата историја и луѓето кои ја создавале, потсетувајќи дека љубовта кон дресот и клубот е вредност што трае вечно.
