Ракометарите на Вардар ја продолжија својата импресивна серија во Суперлигата, забележувајќи ја шестата победа во исто толку натпревари, откако на гостувањето во Радовиш славеа со 27-33.
Иако во составот недостасуваа неколку стандардни првотимци, меѓу кои Малус, Георгиевски, Кеита, Лазаревски и Еспиња, избраниците на Иван Чупиќ уште еднаш покажаа дека квалитетот и тимската игра се на високо ниво.
Домаќините мотивирано го отворија натпреварот и парираа во првите дваесетина минути, кога резултатот се движеше гол за гол. Сепак, по тајм-аутот на Чупиќ, вардарци го засилија темпото и до крајот на полувремето направија разлика од четири погодоци (14-18).
Во второто полувреме скопскиот состав целосно ја презеде контролата и со серија на брзи напади стигна и до двоцифрена предност.
На крајот, Вардар рутински стигна до нови бодови и останува единствениот тим со максимален ефект по шест одиграни кола. Радовиш, пак, и понатаму го чека првиот бод во новата сезона.
Во следното коло, Вардар ќе го пречека Прилеп во СЦ „Јане Сандански“, додека Радовиш ќе гостува во Охрид.
