Претседателот на Фудбалската федерација на Македонија, Масар Омерагиќ, доби ново признание на европско ниво – тој е именуван за член на HatTrick комисијата на УЕФА, едно од најважните тела во организацијата кое носи одлуки поврзани со инфраструктурни проекти и едукативни програми за фудбалските асоцијации.
Именувањето беше потврдено на состанокот на Извршниот одбор на УЕФА во Билбао, додека првиот состанок на новиот состав се одржа во Каунас, Литванија. На оваа средба, претседателот на Шведската фудбалска федерација и челник на HatTrick комисијата, Карл-Ерик Нилсон, му посака добредојде на Омерагиќ и му врачи пригоден подарок.
„Голема чест и одговорност е да бидам дел од ова тело кое одлучува за клучни инфраструктурни и развојни прашања во европскиот фудбал. Му благодарам на претседателот Чеферин и на Извршниот комитет на УЕФА за довербата. Со нетрпение очекувам да придонесам во процесите кои ќе донесат напредок и за македонскиот, и за европскиот фудбал,“ изјави Омерагиќ.
Ангажманот на првиот човек на ФФМ во оваа комисија претставува големо признание за македонскиот фудбал, особено во период кога развојот на инфраструктурата е еден од приоритетите за иднината на спортот во земјата.
