Македонскиот шампион Шкендија со пораз го започна своето историско учество во групната фаза од Конференциската лига. Тетовчани на гостувањето во Мадрид загубија од шпанскиот прволигаш Рајо Валјекано со 2-0, во натпревар кој беше решен уште во првото полувреме.
Шпанците уште од самиот старт ја презедоа иницијативата, а првата посериозна закана стигна во 14. минута, кога голманот Бубакар Гаје одлично интервенираше. Неколку минути подоцна, Цаке за малку ќе си постигнеше автогол, но успеа да ја исправи грешката. Сепак, притисокот на домаќините резултираше со два брзи погодоци – најпрво Унаи Лопез во 28. минута, а потоа Фран Перез во 32. минута ја запечатија судбината на Шкендија.
Во второто полувреме, Рајо ја контролираше играта и без голем напор ја сочува предноста. „Црвено-црните“ од Тетово делуваа инфериорно, упатувајќи само еден удар кон голот на противникот, наспроти десетте обиди во рамките на голот што ги имаа Шпанците. Домаќините изведоа и двоцифрен број корнери, додека Шкендија не успеа ниту еднаш да ја постави топката на аголот.
И покрај поразот, за избраниците на Јетон Беќири ова беше натпревар кој ќе остане запишан во клупската историја како прв настап во групите на едно европско натпреварување. Шкендија во следното коло ќе ја има шансата за први бодови, кога во Скопје ќе го пречека ирскиот состав Шелбурн.
