Фудбалска недела исполнета со адреналин ја очекува публиката во Валандово. На 28 септември, со почеток од 15:00 часот, на Градскиот стадион ќе се одигра дербито од 4. коло во Третата лига – Исток меѓу домашната Победа и лидерот на табелата, Овче Поле од Свети Николе.
Дуелот привлекува огромно внимание, бидејќи се судираат два тима кои одлично ја започнаа сезоната. Гостите од Свети Николе имаат перфектен биланс – три победи од три натпревари. Тие се вистинска машина за голови со девет постигнати погодоци, а посебно се издвојува нивната цврста одбрана која прими само еден гол – најдобра во целата лига.
Но, и Победа Валандово не заостанува. Екипата одигра два натпревари, запишувајќи максимален учинок – две победи со шест постигнати и само еден примен погодок. По триумфот од 3:0 над Ударник дома и гостинската победа од 1:3 против Светлост во Зрновци, валандовци влегуваат во дербито со полн оптимизам и силна поддршка од публиката.
Овче Поле досега ја совлада Тиверија со 3:0, потоа Карбинци со 2:1, а во минатото коло славеше убедливо со 4:0 против Брегалница Делчево. Победа, пак, беше слободна во првото коло, но брзо се наметна како екипа која ќе има што да каже оваа сезона.
Неделниот дуел не е само борба за три бода – тоа е пресметка за престиж, за врвот на табелата и за докажување кој е подготвен да води битка за највисоките цели. Атмосферата на трибините ветува спектакл, а влезницата од 100 денари е мала цена за фудбалско уживање.
Едно е сигурно – на Градскиот стадион во Валандово ќе се игра натпревар кој долго ќе се памети, а верните „Калинкари“ ќе ја „запалат“ атмосферата.
