Македонија ќе има свои претставници на престижните квалификации за светското првенство во е-фудбал – FIFAe World Cup 2025, кое ќе се одржи во саудискиот град Ријад со награден фонд од 100.000 долари. Настанот, кој се организира по втор пат под капата на FIFA, оваа година достигнува највисоко можно ниво, со учество на држави од сите континенти и бројки речиси како реалното светско првенство во фудбал.
Нашата земја ќе ја претставуваат Иван Иванов од Радовиш и Давид Гаревски од Битола, двајца повеќекратни државни шампиони и едни од најдобрите е-фудбалери во Македонија. Тие ќе настапат во форматот 2 на 2, каде ќе се борат за пласман на големото финале во Ријад.
Регионалните квалификации за Европа ќе се одржат од 25 до 28 септември, во групна и нокаут фаза. Македонија ќе игра во една од најтешките групи, заедно со Швајцарија, Босна и Херцеговина, Грузија, Холандија, Португалија и Кипар.
Само најдобрите четири репрезентации од групата ќе продолжат понатаму, а на крајот само три европски селекции ќе обезбедат место на финалето во Саудиска Арабија.
Иван Иванов за Спортска Мрежа открива повеќе за подготовките и очекувањата пред големите предизвици.
„За натпреварите се подготвуваме секојдневно, се внимава на сите детали, од одбирање на вистинските и најдобри играчи, анализа на противниците и на крај тренирање на нашата тактика и игра. Фокусот ни е на најголемо ниво и може да кажам нескромно, очекувањата ни се големи, за прва цел ни е поминување на групите, а потоа преку нокаут фазата нормално влез во финале.“
Радовишанецот додава дека групата е исклучително тешка, вели дека ќе се соочат со одлични и докажани играчи.
„Во групата сме 7 држави и првите 4 поминуваат понатаму. За противници ги имаме Швајцарија против кои ги започнуваме овие квалификации, потоа Босна и Херцеговина, Грузија, Холандија, Португалија и Кипар. Една од потешките групи со многу одлични и докажани играчи.“
Квалификациите ќе се играат по региони и ќе бидат целосно онлајн, додека финалето ќе се одигра офлајн во Ријад, каде ќе стигнат само најдобрите 12 репрезентации – 11 преку квалификации и домаќинот Саудиска Арабија.
Сите натпревари ќе бидат пренесувани во живо на YouTube и Twitch, што ќе овозможи јавноста да ги следи настапите на македонските претставници во борбата за пласман на големата сцена.
