Капитенот на машката сениорска репрезентација на Македонија 37-годишниот Никола Ѓорѓиев има нов клуб, потпиша за Рапид Букурешт. По кратката епизода во Турција тој одлучи да го промени клубот и средината и оваа сезона ќе го носи дресот на Рапид.
„Одлично се адаптирам во клубот и во новата средина. Се приклучив на екипата на стартот на подготовките на планина и по две седмици поминати таму, сега сме во Букурешт каде продолжуваме со работа. Имаме неколку отсуства на играчи каде што имаат репрезентативни обрски со настапи на СП, но до крајот на оваа недела се надевам дека ќе бидеме комплетни затоа што следи фазата на воигрување во тимот. Почетокот на првенството започнува на 18 октомври, а до тогаш имаме три силни турнири во Брашов, Галаци, и Залау. Имаме одлични услови за работа, фантастична организација, и атмосфера во клубот и верувам дека ги имаме сите предуслови да добра и успешна сезона.“ – изјави капитенот Ѓорѓиев.
За 37-годишниот коректор ова ќе биде 21-ва интернационална сезона, со што дополнително го потврдува својот статус на еден од најдолговечните и најуспешните македонски спортисти. Досега настапуваше за клубови во Словенија, Србија, Италија, Јапонија, Полска, Турција и Германија, а сега и Романија оставајќи силна трага на секоја одбојкарска сцена каде што играл.
Со потписот за Рапид, Ѓорѓиев ќе има нова можност да ги потврди своите квалитети во нападот и да ја продолжи богатата кариера со уште едно големо поглавје.
