Младиот македонски тенисер Марко Алексовски имаше извонреден настап на меѓународниот турнир „Shkodra Open“ што изминатата недела се одржа во албанскиот град Скадар. Тој успеа да запише двоен триумф, освојувајќи ја титулата и во сингл и во конкуренцијата на двојки.
Во поединечна конкуренција Алексовски одигра сигурен турнир, а во финалето беше убедлив против домашниот претставник Денис Габа, кого го совлада со 2-0 во сетови (6:2, 6:0), при што загуби само два гема. Најголем предизвик за Марко беше полуфиналниот меч против Иван Пјачура, кој заврши со тесна победа од 2-0 (7:5, 7:6). Во претходните рунди, како прв носител беше слободен во првото коло, а потоа ги совлада Џанмарко Мендола од Италија (6:2, 6:2) и Василеиос Ликуресис од Грција (6:3, 6:1).
Во конкуренција на двојки, Алексовски настапи токму со Пјачура како партнер. Двајцата заедно одиграа одличен турнир, а во финалето успеаја да ги совладаат грчките тенисери Василеиос Ликуресис и Танос Херопулос со 2-0 во сетови (6:1, 7:6).
Со овие успеси, Алексовски уште еднаш потврди дека е еден од најперспективните млади македонски тенисери кој чекор по чекор го гради својот меѓународен пат.
