Прилепскиот второлигаш остана без тренер откако Стојанче Дунимаглоски си поднесе оставка. Ваквата одлука на младиот тренер доаѓа после големиот пораз на Победа од Скопје на стадионот „Железарница“ во Автокоманда од 8:1.
Победа која е во тотален хаос, сега остана и без тренер, со што ќе треба да се решава и испразнетото тренерско место.
Прилепчани сезоната ја отворија со пораз од Новаци во гости (2:0), потоа на домашен терен забележаа реми од 2:2 против Каменица Саса, но веќе во третото коло следуваше вистинска катастрофа – пораз од 5:0 во Ресен од Преспа.
Во четвртото коло Победа беше блиску до бодови, но загуби од Охрид со 2:3, а пак во рамки на 5. коло беше декласирана од Скопје со 8:1.
Со само еден освоен бод и учинок од четири порази и едно реми екипата на Победа е претпоследна со само еден бод, а гол разликата е пет постигнати и 20 примени погодоци.
Но, Победа се соочува и со многу други посериозни проблеми, пред се финансиите и долговите, што отвара едно сериозно прашање како клубот ќе се нормализира, ако воопшто може, бидејќи во претходните сезони до последно коло се бореше за опстанок, а една сезона и играше бараж за опстанок, но се чини дека сезонава ќе биде тешко и за такво нешто.
