Второлигашот Осогово од Кочани ја уредни и опреми новата соблекувална, која ќе биде наменета за младинските категории. Клубот им се заблагодари на сите верни навивачи и поддржувачи кои купувале од нивниот пункт за освежителни пијалоци и грицки.
„Би сакале да им изразиме огромна благодарност на сите наши верни навивачи и поддржувачи кои купуваа од пунктот за освежителни пијалоци и грицки. Со вашата несебична поддршка и придонес успеавме да ја уредиме и опремиме новата соблекувална, која ќе биде наменета за нашите младински категории. Вашето учество е од клучно значење за иднината на клубот и младите таленти кои се стремат кон успех. Ви благодариме што сте дел од ова семејство и што заедно градиме подобри услови за нашите идни шампиони“, се вели во соопштението на Осогово.
Осогово кога е во прашање вакви активности е доста организиран. За време на натпреварите од Втората македонска фудбалска лига сите навивачи, симпатизери, но и оние кои сакаат да го поддржат клубот може да си купат навивачки реквизит како маички, шалови, украси и слично, а притоа со тоа клубот остварува приходи кои му се од големо значење како за сениорскиот тим така и за младинските категории.
Во рамки на Втората лига по завршувањето на репрезентативната пауза Осогово на домашен терен ќе игра против Арсими, во рамки на 8. коло.
