В недела ново дерби во Првата македонска фудбалска лига, овој пат во Македонска Каменица, второ дерби на колото во низа за Тиверија Брера која ќе гостува кај Каменица Саса.
Ова ќе биде дерби на третопласираната Саса која има 18 бодови и лидерот Тиверија Брера кој на своето конто има бод повеќе односно 19.
Двете екипи сакаат титулата во фудбалската елита на Македонија во женска конкуренција, но и да се обезбедат „виза“ за Европа. Дербито ќе започне во 14 часот.
Топ Гол на домашен терен ќе има незгоден меч со тимот на Скопје. Битолскиот тим има победа и две ремија, а пак Скопје е со четири победи и три порази. Фаворит на мечот ќе биде Скопје, а пак Топ Гол ќе се потпира на домашниот терен и поддршката од домашната публика. Мечот ќе започне во 15 часот.
Истатов во претходното коло го шокираше Ас Јунајтед во Струга и силно мотивиран ќе ја бара третата сезонска победа против повратникот Атлетико, кој пак на теренот во скопско Пржино ќе атакува на второ сезонско славје. Натпреварот ќе започне во 13 часот.
Шампионот Љуботен на домашен терен ќе се соочи со Ас Јунајтед од Струга, екипа која не тргна според очекуваното во новата сезона. Шампионот во претходното коло одигра 1:1 со лидерот Тиверија Брера, а сега сигурно е дека ќе сака три бодови, бидејќи струмичанки имаат ново дерби со Каменица Саса, а тоа може да значи и промена на врвот од табелата, ако Тиверија Струмица „киксне“ во Македонска Каменица. Од друга страна, Ас Јунајтед е во голема резултатска криза, ниту голгетерката Улза Максути не може да помага да се обезбедат бодовите, па со само шест бодови од седум натпревар Ас Јунајтед е на 6. место, а во Тетово оди по изненадување и одигрување на квалитетен меч, кој ќе стартува во 15 часот.
Екипата на Речица во оваа коло ќе биде слободна.
