Најтрофејниот фудбалскиот клуб Вардар и официјално доби нов сопственик од Унгарија, со 85% од акциите на компанијата односно АД ФК Вардар – Скопје, со тоа и управувачкиот пакет на друштвото.
Нов сопственик на скопски Вардар е Атила Бижен Жалили, кој преку соопштение се обрати до јавноста, а во истото се вели дека Вардар финансиски ќе се стабилизира, како и резултатски, но и дека Вардар одново ќе биде голем клуб.
„Задоволство ми е да ја информирам македонската јавност дека од 7.10.2024 година, според претходно потпишан договор, 85% од акциите на АД ФК Вардар – Скопје се преземени со управувачкиот пакет на компанијата. Имаме повеќегодишно искуство во менаџирање на големи фудбалски клубови и соработка со многу познати фудбалски клубови во Европа, ветуваме брза финансиска, организациона и резултатска консолидација на овој најголем спортски бренд во Македонија. Во изминатите години, како дополнување на нашите бизниси кои ги имаме, нашата цел беше да превземеме клуб од Централна Европа или Балканот. Имавме неколку опции, но благодарение на аргументите кои ни претстави г-дин Миленко Неделковски, се решивме за најголемиот спортски бренд во Македонија. Ајде да го направиме Вардар повторно голем.“, стои во соопштението на новиот сопственик на Вардар.
Вардар во низа имаше два големи порази од Шкендија во Тетово со 4:0, но и од шампионот Струга Трим Лум дома од 1:4. Вардар е во долниот дел од табелата со седум бодови.
