Ресен од оваа сезона ќе има нов ракометен претставник – ГРК Преспа, клуб кој е резултат на фузијата помеѓу СРК Преспа Вардар и Младост Ресен. Новоформираниот тим ќе се натпреварува во Првата лига, со амбиција да ја врати ракометната традиција на градот на високо ниво.
Според претседателот Александар Крстевски – Пента, обединувањето на двата клуба е стратешки потег за развој на ракометот во Преспа и создавање на посилен и поконкурентен тим.
Во новата клупска управа покрај Крстевски се наоѓаат и Николче Даскаловски, Никола Ставревски, Дејан Петровиќ и Дане Ѓоргиевски, луѓе кои имаат заедничка цел – да го вратат ракометот во Ресен на старите патеки на успех.
Ресен е град со богата ракометна историја и кадар кој низ годините создавал бројни врвни играчи, а Преспа Јафа Промет, како некогашен шампион, беше првиот клуб од овој регион кој избори настап во групната фаза од Лигата на шампионите.
Со создавањето на ГРК Преспа, љубителите на ракометот во Преспа повторно добиваат причина за гордост, а клубот влегува во нова ера со јасна цел – враќање на ресенскиот ракомет на големата сцена.
