Со три натпревари денес беше отворено вонредното 8. коло од Првата женска фудбалска лига, кое донесе седум погодоци во Струга за изненадување и голем триумф на Истатов од 3:4 над Ас Јунајтед.
Меланија Грозданова е херојот за тимот на Истатов, откако постигна три погодоци со што практично таа беше најзаслужна за оваа голема победа на Истатов над фаворитот Ас Јунајтед до која дојде преку пресврт откако на полувреме резултатот беше 3:1.
Јована Павловска во 11. минута погоди за 1:0, а Грозданова израмни на 1:1 во 22. минута. До крајот на мечот искусната голгетерка Улза Максути со два гола обезбеди 3:1 по првите 45 минути.
Во второто полувреме се случи комплетна промена во играта кај гостинот, кој преку Грозданова во 70. минута дојде до 3:2 и со тоа се врати во игра барам за бод, а Канита Емини во 82. минута израмни на 3:3, а тоа понуди атрактивна завршница во Струга.
Кога сите мислеа дека исходот ќе биде поделба на бодовите Грозданова во 93. минута стрелаше за конечни 3:4 и комплетен пресврт за победа на Истатов.
Градското дерби во Битола заврши без победник откако Атлетико и Топ Гол ги поделија бодовите откако одиграа реми без погодоци (0:0).
Скопје 2014 со „петарда“ ја среди Речица за висока победа од 5:0. Мила Панева беше двоен стрелец за домаќинот, а по еден гол постигнаа Сара Коларовска, Кристина Крстева и Сара Евтинџиоска.
Колото ќе се комплетира утре со мега дербито меѓу Тиверија Брера и Љуботен, дерби кое се игра утре на Општинското фудбалско игралиште со вештачка трева во Струмица со почеток од 15 часот, каде главен судија ќе биде Кирил Смоквоски од Прилеп.
