Попладнево започна меморијалниот ракометен турнир „Крсте Андоновски“ во Охрид, со натпревар помеѓу екипата на Вардар 1961 и Динамо Панчево од Србија. Двократниот европски шампион Вардар со победа го отвори турниот во Охрид, на првиот меч.
Натпреварот започна изедначено, со погодоци на двете страни, па така, некаде на средината на првото полувреме имавме резултат 7:7. Од 18.минута па до пред крајот на полувремето, Вардар одржуваше два гола разлика, а во 26. минута за првпат во мечот стигна и до три разлика- 13:10.
Пред крајот на полувремето, со гол од пенал кој го погоди Јака Малус, Вардар стигна и до плус четири, меѓутоа Динамо брзо врати и намали повторно на три, па така на пауза се замина со резултат 14:11 за Вардар.
По паузата, Вардар почна да ја зголемува предноста, па така, во 8.минута веќе имаше пет гола предност пред гостите од Србија, односно 19:14. Како што одминуваше времето, екипата на Вардар стигна и до шест позитива, но со мини- серија, тимот на Динамо не дозволуваше Вардар да се одлепи со многу посериозна предност уште во оваа рана фаза од вториот дел.
Сепак, Динамо немаше сили да ја стопи предноста на Вардар, па во 17.минута од натпреварот, Вардар одново стигна до своите највисоки шест позитива, а резултатот гласеше 25:19 за Вардарци. На десет минути до крајот на мечот, македонскиот тим водеше со 27:20. До крајот на средбата, Динамо успеа да се доближи и до минус два, но сепак немаше време за нешто повеќе, па мечот заврши со победа на Вардар од 29:27.
Кај Вардар најдобри стрелци со по пет гола беа Дмитро Горига и Јака Малус, а кај Динамо Панчево се истакна Илија Богдановиќ со седум реализации, а кој воедно беше прогласен и за МВП на натпреварот.
