Екипата на Охрид е првиот финалист на Турнирот покрај Езерото, откако вечерва ја совлада екипата на Бурса со 38:28, во натпревар кој требаше да биде дерби на денот, меѓутоа заврши со десет гола разлика.
Всушност, разликата на крајот не е многу реална слика на целиот натпревар, бидејќи Бурса даваше доста отпор, особено во првото полувреме. Бурса успеа одвреме-навреме да создава закани преку играчи како Билим и Шешиќ, па така полувремето заврши со резултат 16-13, во корист на Охриѓани.
Турците имаа расположени голмани, добри шутеви, но исто така и доста загубени топки, што придонесоа за ваков резултат. Иако добија шанса да се приближат и на само еден гол разлика, Чаневски им одбрани пенал, што беше пресуден момент за охридскиот тим да се одлепи на 20-17. По ова, „гладијаторите“ ја контролираа играта и постепено ја рушеа одбраната на Бурса.
Гледачите на отвореното игралиште ,, Горан Попоски Бабец “ во Струга, имаа можност премиерно да ги видат сите нови засилувања на амбициозниот Охрид за оваа сезона. Тренерот- Борис Ројевиќ, еден по еден, ги претстави сите свои адути за претстојната сезона, и им даде шанса на сите да ја почувствуваат атмосферата на теренот во Струга. Охрид делуваше доста моќно во овој натпревар.
Кај Бурса, Ѓокај Билим постигна дури десет голови, додека голманите Емре и Берекет забележаа 14 одбрани, вклучувајќи и три пенали. Во редовите на Охрид, Ојлески даде шест гола, Лиапис пет, Иванковиќ и Стрмљан по четири, а Чаневски имаше осум одбрани.
Со ова, новиот тренер Борис Ројевиќ го забележа својот прв триумф, а веќе во сабота, во 20:40 часот ќе има шанса да го освои својот прв трофеј со „гладијаторите“. Нивниот противник во финалето ќе биде или Бутел Скопје, или Тиквеш, што гарантира македонска финална пресметка.
