Двократниот македонски шампион Струга Трим Лум го претстави своето ново засилување во нападот – српскиот голгетер Ѓорѓе Ивковиќ. По денешната потврда на Алтин Алији, стружани добиваат уште една „деветка“ со која значително ќе го засилат офанзивниот ред за претстојната сезона.
Ивковиќ е добро познат на љубителите на македонскиот фудбал, откако од јануари 2024 до февруари годинава настапуваше за Брера Струмица. Во Првата македонска фудбалска лига одигра 31 натпревар и постигна 17 голови, навестувајќи дека ќе биде сериозна закана за противничките одбрани и во дресот на Струга.
Пролетниот дел од минатата сезона го мина во казахстанскиот Актобе, за кој одигра 10 натпревари и запиша по еден гол и асистенција. Ова му беше втор ангажман во Казахстан, откако претходно играше и за Акжајик.
Во својата богата кариера, 29-годишниот напаѓач настапувал за бројни клубови: Колубара, Турбина, Јединство Уб, Бежанија, Слобода Ужице, Спартак 1924, Анкаран, Телепото Оптикс, Синѓелиќ, Железничар Панчево, Раднички Срем, Златибор, ИМТ и Лачи.
Со доаѓањето на Ивковиќ, Струга Трим Лум јасно покажува дека амбициите за новата сезона остануваат највисоки – борба за титула и нов излез во европските купови.
