Ракометната легенда на Македонија, Пепи Манасков, ќе ја предводи екипата на Вардар Неготино во новата сезона во Првата лига. Искусниот стратег и раководството на клубот постигнаа договор, а подготовките за новата сезона веќе започнаа.
Неготинци имаат јасна цел – камбек во Суперлигата, каде што настапуваа пред две сезони. Поголемиот дел од носителите на играта остануваат во тимот, што е охрабрувачка вест за Манасков. Клубот е во преговори и со неколку нови засилувања, кои ќе бидат промовирани во наредниот период.
Во тренерската кариера Манасков најдолго работеше во Вардар Јуниор (2013–2019), а беше и на клупата на Куманово, Работнички и младинските категории на Алкалоид. Помошник тренер во Вардар Неготино ќе му биде Ратко Велјанов.
Првата лига започнува на 13/14 септември, а во првото коло Вардар Неготино ќе гостува кај Овче Поле во Свети Николе.
