Македонската кошаркарска репрезентација со пораз (72:80) ги стартуваше претквалификациите за Светскиот Куп 2027, откако во Куманово беше поразена од селекцијата на Романија.
По натпреварот, селекторот Марјан Илиевски не го криеше разочарувањето од исходот:
„Искрено жалам за поразот, особено бидејќи мечот се реши во последните две минути. Натпреварот беше егал, но неколку изгубени топки и промашени отворени шутеви го свртеа резултатот во корист на гостите“, изјави Илиевски на прес-конференцијата.
Тој посочи дека и покрај критиките за изборот на шутевите, ќе продолжи да им дава поддршка на играчите во таквите одлуки.
„Можеби некој ќе праша зошто зедовме брзи шутеви, но тоа беа отворени обиди и секогаш ќе ги поддржувам моите кошаркари кога од кошаркарски аспект одлуката е оправдана.“
Голем проблем, според него, биле 25-те примени поени од втора шанса:
„Тоа е премногу. Знаевме дека физичкиот аспект ќе биде наш проблем, но не успеавме да ги запреме Романците.“
Селекторот се осврна и на подготовките:
„Првите два контролни меча во Гевгелија беа затворени за јавноста, се обидовме да ги заштитиме нашите анализи, но сепак Романците дојдоа подготвени за сите наши напади. Тоа е особено разочарувачки за мене.“
На крај, Илиевски посочи и на проблемот со статусот на нашите играчи во нивните клубови:
„Ако овие играчи се носители на играта во нашата репрезентација, а повторно имаат епизодна улога во своите клубови, тогаш тоа е сериозен проблем.“
