Македонскиот фудбалски шампион во женска конкуренција, ЖФК Љуботен, обезбеди пласман во финалниот плеј-оф за влез во Лигата на шампионите, откако во полуфиналниот дуел славеше со убедливи 4-1 против тимот на Рунавик.
Тетовки доминираа уште од самиот старт, обезбедувајќи водство 3-1 на полувремето со головите на Марковска, Мустафа и Максути. Во вториот дел, триумфот беше потврден со погодокот на Нигеријката Мариан Охадиве.
Ова е историски момент за Љуботен, кој стана првиот македонски женски клуб што се пласирал во последното квалификациско коло од Лигата на шампионите, според новиот формат воведен во 2021 година.
Во финалето, Љуботен ќе се соочи со ерменскиот претставник Пјуник, кој во другото полуфинале ја совлада НСА Софија со 0-1.
Дополнителна предност за македонскиот шампион е фактот што е домаќин на овој квалификациски турнир за пласман во елитната фаза на УЕФА Лигата на шампиони. Во сабота Љуботен против Пјуник ќе игра во 17:00 часот.
