Младиот македонски тенисер Марко Алексовски (роден 2011 година) годинава направи голем чекор напред во својата кариера. Благодарение на успешните настапи на Развојниот шампионат до 14 години, кој се одржа во Анталија, Турција, тој се избори за место во престижниот тим на ITF-Tennis Europe, кој е поддржан од Grand Slam Development Fund.
Овој тим е составен од најперспективните тенисери на возраст до 14 години, а на Алексовски му е овозможено учество на четири меѓународни турнири: еден од Супер категорија и три од Категорија 1. Првиот турнир, кој е од највисока категорија, се одржува во Дурен, Германија. Македонскиот тенисер одлично го започна настапот, совладувајќи го Адам Напари од Финска со 2-0 во сетови (6-2, 6-4). Во следната рунда го очекува дуел со Паоло Карочио од Италија.
Алексовски ќе настапи и во двојки, во пар со Андрија Мартиновиќ од Босна и Херцеговина, со кого ќе се обиде да постигне уште еден добар резултат.
Покрај Марко, во тимот се вклучени и тенисери од Босна и Херцеговина, Турција, Молдавија, Португалија, Грција и Украина. Учество на вакви турнири, како и можноста за работа со врвни тренери и натпреварување со најдобрите млади тенисери во Европа, е од огромно значење за развојот и напредокот на талентирани спортисти како Алексовски.
Македонскиот тенисер веќе имаше забележителни настапи оваа сезона на повеќе турнири во својата возрасна категорија, а учеството на овие четири натпревари претставува значаен чекор во неговата спортска кариера и потврда за неговиот потенцијал.
