Женскиот ракометен клуб Куманово продолжува активно да го креира ростерот за претстојната сезона во Женската лига, со цел уште посилна и поконкурентна екипа. Најново име во тимот е младата голманка Ана Марија Горговска, која доаѓа од редовите на штипска Астибо, каде ја мина претходната полусезона.
Горговска, која претходно го бранеше и голот на ЖРК Гевгелија, ќе формира голмански тандем со искусната Јасна Трајковиќ. Со тоа, Куманово добива стабилна голманска линија, која ќе биде клучна во борбата за висок пласман.
Покрај Горговска, кумановки веќе ги официјализираа новите засилувања Аманда Стеин (десен бек) и Маријана Силва Азеведо (среден бек), кои треба да донесат дополнителна офанзивна сила во тимот.
Клубот успешно ги обнови договорите со клучните домашни ракометарки: Јасна Трајковиќ, Мила Мемов, Ангела Шехтанска, Росана Павлова, Никита Антевска и Нена Несторовска, што гарантира континуитет и стабилност.
Од таборот на Куманово си заминаа Ана Михајловска, која се пресели во Вардар, и Марија Јовановска, која го засили шампионот Ѓорче Петров.
Со овие потези, Куманово јасно го демонстрира својот амбициозен план да биде конкурентен фактор во новата сезона, под водство на тренерот Славиша Димитријески.
