Брегалница во комплетно нов лик ќе ја започне новата сезона во Втората лига со цел да се врати во елитата.
Штипскиот второлигаш доби нов турски инвеститор, доби нова управа и нов стручен штаб на чело со искусниот стратег Влатко Костов од Штип.
Веќе се поставуваат контурите на тимот и со тоа се наѕира како ќе изгледа новата Брегалница.
Новото раководство работи на враќање на фудбалерите од Штип кои во минатото го носеле дресот на Брегалница, што значи дека Брегалница ќе биде на штипски погон.
Дресот на „сините“ во новата сезона како што дознава Спортска Мрежа ќе го носат Анџело Николовски, Стефан Коцев, Стефан Костов, се враќа и Бобан Георгиев, потоа Дарко Алексовски – Пеле и Мартин Димоски – Робен, од претходната сезона од штипските фудбалери останува и младиот Благој Хаџи-Кимов.
Според тоа што го дознава Спортска Мрежа нови засилувања во Брегалница се Дамјан Масевски, кој требаше да биде засилување на Скопје, Горан Силјановски кој се враќа одново во Штип, Виктор Серафимовски, Даниел Карчески и Благоја Спиркоски.
Како што дознава Спортска Мрежа клубот ќе има и нов голман, а од претходната сезона останува и капитенот Давид Калпачки, кој минатата сезона беше меѓу најдобрите во тимот.
На првата прес-конференција од клубот не соопштија кои се новите засилувања, ниту пак кои ќе бидат противниците за одигрување на пријателски натпревари, иако Спортска Мрежа дознава дека генералката ќе биде против Слога Виница на 19 август.
Како што најавија од клубот ќе има нова прес-конференција на која ќе треба официјално да се претстават новите засилувања во штипскиот второлигаш.
