Второлигашот Победа од Прилеп се наоѓа во длабока криза пред стартот на новата сезона. Поголем дел од фудбалерите го напуштија клубот, а дополнителен удар е и повлекувањето на акционерот кој со месеци водеше правна битка за сопственоста на акциите.
Со тоа, славниот прилепски клуб – поранешен шампион на Македонија – среде лето остана без конкретно раководство, без финансии, со сериозни долгови и практично без играчки кадар.
Се најавува формирање на одбор за спас на клубот, а сигурно ќе биде испратен и апел до стопанствениците и сите добронамерни субјекти за помош. Клубот ќе биде доверен на Општина Прилеп, која мора итно да воспостави контакт со идниот одбор и да пронајде начин за стабилизација.
Дополнителна грижа предизвикува фактот што Победа сè уште нема започнато со подготовки, иако првиот натпревар во Втората лига е на помалку од еден месец. Дали поранешниот македонски шампион ќе успее да состави конкурентен тим – засега останува неизвесно.
