Македонскиот пливач Никола Ѓуретановиќ оствари подвиг за паметење, станувајќи државен првак во две различни држави во рок од само неколку дена.
На Летното државно првенство на Македонија, Ѓуретановиќ доминираше во водите, освојувајќи ги признанијата за најуспешен јуниор и најуспешен пливач во апсолутна категорија. Со блескави настапи во повеќе дисциплини, тој уште еднаш го потврди својот квалитет и статус на најдобар македонски пливач.
Без многу одмор, Никола веднаш отпатува за Србија каде настапи на Летното државно првенство за јуниори и за апсолутна категорија, што се одржа на Олимпискиот базен во Белград (50 метри). И таму Ѓуретановиќ се искачи на врвот, станувајќи државен првак на Србија за јуниори. Вредноста на овој успех е уште поголема ако се знае дека зад себе остави двајца пливачи кои неодамна се закитија со медали на Европското првенство.
Овој успех е доказ за посветеноста, напорната работа и континуираниот напредок на Никола Ѓуретановиќ, кој продолжува да ги руши границите и да ја афирмира Македонија на меѓународната пливачка сцена.
