Во одлични услови и со максимална посветеност, машката сениорска одбојкарска репрезентација ги одработува подготовките во Маврово за клучните квалификациски натпревари за Европското првенство 2026. Македонија на 13 август ќе се соочи со Грција, а четири дена подоцна ќе игра против Грузија.
Селекторот Јошко Миленкоски и неговиот стручен штаб засега можат да бидат задоволни од здравствениот биланс, бидејќи тимот тренира без проблеми, дисциплинирано и според предвидениот план. Секојдневно се работи двапати – на терен и во теретана со јасна цел: ново учество на Европско првенство, четврто по ред за македонската селекција.
Најголемиот предизвик ќе биде Грција, противник со кого веќе се соочивме во Европската лига минатиот месец, а според Владо Милев, токму тој натпревар ќе биде клучен на патот кон ЕП.
„Фокусот ни е на Грција. Тоа е најважниот меч за нас во вториот дел од квалификациите и таму мора да го дадеме максимумот. Игравме со нив неодамна, знаеме што не очекува и верувам дека ако бидеме комплетни и без повреди, можеме да им се спротивставиме рамноправно. Имаме доволно искуство, а младите играчи внесуваат свежина и енергија. Со квалитетните подготвителни натпревари што не очекуваат, верувам дека ќе ја кренеме формата до посакуваното ниво“, изјави Милев.
Репрезентацијата до крајот на неделата останува во Маврово, а потоа ќе замине во Софија, каде ќе одигра две контролни средби со Бугарија – што ќе биде прва проверка пред квалификациските предизвици во август.
