Познатиот македонски кардиолог и страстен алпинист, д-р Сашко Кедев, испиша историја станувајќи првиот Македонец кој ги искачил сите светски врвови повисоки од 8.000 метри!
Овој историски успех Кедев го заокружи со освојувањето на врвот Гашербрум 1 (8.080 метри) во Пакистан, во експедиција заедно со двајца алпинисти од Непал и еден од Кина.
Со ова искачување, Кедев ја комплетираше листата на сите 14 највисоки врвови на планетата, подвиг со кој може да се пофалат само мал број алпинисти ширум светот. Во својата алпинистичка кариера, тој ги освои: Еверест, К2, Канченџунга, Лхоце, Макалу, Чо Оју, Дхаулагири, Манаслу, Нанга Парбат, Анапурна, Шишапангма, Брод Пик, Гашербрум 2 и сега Гашербрум 1.
Ова е уште еден доказ за неверојатната упорност и посветеност на д-р Кедев, кој покрај врвната кариера во медицината, испиша и златна страница во македонскиот и светскиот алпинизам.
