Тимот на Струга Трим Лум доби ново засилување пред стартот на сезоната 2025/26. Киријакос Мазулуксис е најновиот фудбалер кој му се приклучи на македонскиот прволигаш, а со тоа стана и првиот Грк кој ќе го носи дресот на стружани.
28-годишниот дефанзивец доаѓа како слободен агент, откако му истече договорот со Паниониос, неговиот последен клуб. Во својата кариера има значајно искуство во грчкиот фудбал, настапувајќи во Суперлигата за неколку екипи меѓу кои АЕ Кифисијас, ПАЕ Ханија, ПАС Ламија, Ерготелис и Арис од Солун, клуб каде што потпиша и професионален договор.
Ова ќе биде негово второ меѓународно искуство, по кратката епизода во белгиски Лирс.
Мазулуксис игра на позиција централен бек, но исто така може да биде употреблив и како десен бек или дефанзивен играч за врска. Со Струга Трим Лум потпиша едногодишен договор со опција за продолжување на соработката уште две години.
Стружани му посакаа топло добредојде и многу успех во новата средина со „црвено-белиот“ дрес.
