Фудбалскиот клуб Слога Виница официјално ги започна подготовките за сезоната 2025/26 во Втората македонска фудбалска лига (ВМФЛ). Тимот под водство на стратегот Емил Грнев ќе ги одработува главните подготовки на Градскиот стадион во Виница.
Во новата сезона, Слога ќе влезе со речиси идентичен костур на екипата од минатата сезона, има неколку заминување, но тоа нема да влијае врз стабилноста на тимот. Раководството активно работи на доведување засилувања, кои треба да внесат свежина и потребно искуство за уште посилен настап во лигата.
Минатата сезона Слога остави силен впечаток во Трета лига – Исток со добрите резултати, препознатливата игра и посветената работа на стручниот штаб. Клубот верува дека со напорна работа и поддршка од верната виничка публика, ќе може рамноправно да се бори со сите конкуренти.
Како и досега, клубот ќе продолжи со вклучување на млади таленти од сопствената академија во сениорскиот тим, кои ќе добијат шанса на пријателските натпревари за да се наметнат пред тренерот Грнев.
Клубот најави дека навремено ќе ја информира јавноста за новите засилувања, закажаните контролни натпревари и сите новитети поврзани со екипата.
