Македонскиот футсал шампион Форца го гради ростерот за новата сезона со задржување и продолжување на соработката со важни играчи од минатата сезона.
Клубот од Куманово кој се подготвува за квалификациите од Лигата на шампионите, а притоа ќе биде организатор и домаќин на групата потврди дека е продолжена соработката со капитенот Таулант Исмаили, со голманот Иван Стојановски, Берат Рамадани, Јасир Зекири како и со Артан Јонузи.
Исмаили е искусен фудбалер кој е важен и клучен во екипата, искусниот голман Стојановски ќе продолжи да го чува голот на Форца, Зекири е „дијамантот“ на клубот, Јонузи кој пристигна во зимскиот преоден рок од претходната сезона останува во Форца, а искусниот Рамадани останува верен и во следната сезона.
Во следниот период раководството на Форца ќе работи на активност градење на ростерот, а низ квалитетни подготовки за новата сезона ќе оди по нови успеси со одбрана на двојната круна во домашниот шампионат, а пак во Европа по предизвиците кои го очекуваат клубот во квалификациите од Лигата на шампионите.
Како што веќе објави Спортска Мрежа, ждрепката која беше одржана во седиштето на УЕФА во Нион, Швајцарија Форца се најде во групата А заедно со Ереван од Ерменија, Енкамп од Андора и С.С. Мура од Сан Марино.
Форца две сезони во низа е шампион во Првата футсал лига на Македонија и го освојува Купот односно двојната круна.
