Македонскиот велосипедизам забележа голем успех на Балканското првенство во планински маратон што се одржа во Блидње, Босна и Херцеговина. Нашата претставничка Дуња Иванова, настапувајќи за сениорската репрезентација на Македонија, успеа да се закити со сребрен медал и да стане балканска вицешампионка.
Таа ја совлада исклучително тешката патека долга 73 километри со вкупно висинско искачување од 1.600 метри, завршувајќи со време од 4 часа и 21 минута. Победничка во женската конкуренција беше Мануела Муресан од Романија, додека третото место го освои Нина Видовиќ од Босна и Херцеговина.
Одличен настап имаа и македонските натпреварувачи во машка конкуренција. Јован Паневски го освои четвртото место, додека Александар Милошевски заврши петти, што е уште еден доказ за континуираниот напредок на македонскиот велосипедизам.
За уште поголем успех се погрижи Љубиша Кондев, кој во категоријата Мастерс се искачи на највисокото место на пиедесталот, освојувајќи го златниот медал и уште еднаш потврдувајќи ја својата класа и искуство.
Овие резултати се доказ за квалитетот и напорната работа на македонските велосипедисти и сериозна најава за уште поголеми дострели на меѓународната сцена.
