Младинскиот погон на ФК Брера Струмица веќе ги вклучи моторите за новата сезона. Генерациите 2008 и 2009, под водство на искусниот стратег Мартин Алаѓозовски, ги започнаа подготовките со јасна цел – продолжување на доминацијата и градење на нови успеси.
Особено внимание ова лето ќе биде насочено кон меѓународниот турнир „Христо Бонев 2025“, кој ќе се одржи од 13 до 22 јули во Бугарија, и каде шампионска генерација на струмичани, која две сезони по ред ја освојува дуплата круна, ќе се соочи со реномирани клубови од Балканот и пошироко.
Учесници на турнирот ќе бидат Локомотив Пловдив (Бугарија), Славија Софија (Бугарија), ЦСКА Софија (Бугарија), Раднички Ниш (Србија), Локомотива Загреб (Хрватска) и уште многу други силни екипи.
Турнирот ќе биде вистински предизвик и прилика за докажување на талентот и квалитетот кој го поседуваат овие млади фудбалери од Струмица. Брера Струмица уште еднаш потврдува дека сериозно инвестира во младинската школа и создава генерации подготвени за највисоки предизвици.
