Вардар со една нога е во следната фаза од квалификациите на Конференциската лига на УЕФА, откако вечерва на националната арена „Тодор Проески“ во Скопје со убедливи 3:0 го декласираше тимот на Ла Фиорита од Сан Марино.
По чистите мрежи во првиот дел (0:0) на стартот од вториот дел Азер Омерагиќ погоди за отварање на резултатот и водство на Вардар од 1:0.
Потоа следуваа два нови погодоци на Вардар, откако Мацоти си постигна автогол по ударот на Јанкулов, а потоа Роџерс Мато постигна гол за конечни 3:0.
Работнички и Силекс загубија на првите натпревари во квалификациите за КЛ.
Тимот од Дебар Маало доживеа пораз во Унгарија од Торпедо Бегаз со резултат од 3:0. Резултат на стадионот на Халадаш го отвори Павел Седко, а во вториот дел погоди Вадим Побудеи за двојна предност од 2:0.
Во финишот од мечот Стефен Алфред погоди за конечни 3:0, а ваквиот резултат ќе биде невозможна мисија за Работнички да дојде до предност од четири гола на домашен терен за да помине во следна фаза.
Силекс загуби од екипата на Дечиќ во Црна Гора со резултат од 2:0. Андреј Бајовиќ постигна гол во 39. минута за отварање на резултатот и водство на домаќинот од 1:0 на полувреме. На стартот од вториот дел македонскиот прволигаш од Кратово остана со играч помалку на теренот, откако Мартин Мирчевски заработи црвен картон.
Предноста од играч повеќе на теренот ја искористи Дечиќ кој преку Ибрахима Ендиаје постигна гол во 70. минута за конечни 2:0.
Реванш средбите се за седум дена. Силекс и Работнички ќе играат во Скопје, додека пак Вардар ќе гостува.
