Фудбалскиот клуб Осогово од Кочани ги започнува подготовките за сезоната 2025/26 со јасна цел – стабилен пласман и избегнување на неизвесноста околу опстанокот во Втората македонска фудбалска лига.
Предводени од искусниот стратег Крсте Крстев, „жетварите“ ќе стартуваат со тренинзите на 14 јули, а веќе е познат и распоредот на пријателските натпревари преку кои ќе се темпира формата пред новата сезона.
Кочанчани ќе одиграат вкупно шест контролни мечеви, три во јули и три во август. Генералната проба е закажана против Беласица во Струмица на 16 август, точно една недела пред стартот на првенството (23 август).
- Распоред на пријателски натпревари:
23 јули: Осогово – Брера Струмица (домашен терен)
26 јули: Вардар Неготино – Осогово (гостински терен)
30 јули: Осогово – Тетекс (дома)
6 август: Осогово – Каменица Саса (дома)
9 август: Осогово – Детонит Плачковица (дома)
16 август: Беласица – Осогово (во Струмица)
Минатата сезона Осогово заврши на 14-тата позиција, во бараж-зоната, иако беше поразен во баражот од Шкендија Арачиново, клубот доби втора шанса преку ждрепка и остана во Втората лига. Токму тоа беше мотив плус за раководството на клубот да се фокусира на создавање на поконкурентен состав.
Меѓу новите имиња се Христијан Митревски, искусен дефанзивец кој доаѓа од редовите на новиот прволигаш Башкими, како и Филип Лазаревски, голман што доаѓа од Вардарски Богданци, за што веќе објави Спортска Мрежа. Од клубот најавуваат уште неколку квалитетни засилувања во следниот период.
Контролните средби ќе бидат од големо значење за воигрување на тимот и влез во натпреварувачки ритам пред официјалниот старт на сезоната, а од клубот апелираат до навивачите да ја дадат својата поддршка.
