Македонскиот ракометен прволигаш Младост од Богданци не запира со засилувањата пред стартот на новата сезона. Шестото летно име во ростерот на амбициозниот клуб е голманот Кристијан Костадиновски.
Се работи за 23-годишен чувар на мрежата, висок 190 сантиметри, кој доаѓа од суперлигашот Радовиш. Со искуството од елитната конкуренција, Костадиновски треба да биде еден од клучните играчи во обидот на Младост да се врати на суперлигашката сцена.
Клубот веќе ја оформи новата структура на тимот, со именување на Горан Андоновски како предводник на стручното раководство. Неговиот син, Даниел Андоновски, е меѓу најзвучните засилувања ова лето, заедно со Гоце Аргиров, Никола Димитров, како и странските имиња Лазар Адамовиќ и Никита Соколов.
Младост Богданци влегува во сезоната 2025/26 со јасна цел – борба за елитниот статус и создавање конкурентен состав кој ќе може да се носи со најдобрите во македонскиот ракомет.
