Македонската репрезентативка Билјана Панеска на само 19-годишна возраст го оствари својот прв интернационален трансфер, со што направи голем чекор напред во својата фудбалска кариера. Панеска ќе ја продолжи својата кариера во Агја Параскеви од Грција, каде ќе има можност да се натпреварува на меѓународната сцена.
Панеска е родена на 30 август 2005 година во Струмица, а нејзината фудбалска приказна започнува на 11 октомври 2015 година кога стана дел од ЖФК Тиверија Брера. Таа помина низ сите возрасни категории во клубот – од кадетскиот, преку младинскиот до сениорскиот тим – и се изгради како клучна фудбалерка со силно присуство и примерен однос.
Во текот на изминатите години, Панеска беше дел и од кадетската, младинската и сениорската репрезентација на Македонија, каде со својата посветеност и игра заслужено го носеше дресот со државниот грб.
„Покрај нејзините фудбалски квалитети, Билјана израсна во прекрасна девојка на која сме особено горди и остави огромен белег во досегашното постоење на клубот. Ѝ посакуваме многу спортска среќа и успех во новиот клуб“, велат од ЖФК Тиверија Брера.
Панеска со овој трансфер не само што прави голем личен исчекор, туку служи и како инспирација за сите млади девојки кои чекорат по патот на женскиот фудбал во Македонија.
