Управниот одбор на Фудбалската федерација на Македонија денес донесе одлука за кадровски промени во судискиот оддел, при што Емил Божиновски е именуван за нов претседател на судискиот одбор.
На оваа функција Божиновски ќе го наследи Александар Ставрев, кој досега ја извршуваше таа должност. Покрај промената на чело на одборот, доаѓа до уште една измена – Јосип Бартон влегува во судискиот одбор на местото на Дејан Костадинов.
Божиновски е поранешен македонски фудбалски судија со богато меѓународно искуство. Како долгогодишен интернационален арбитар, има судено натпревари од највисок ранг – во Лигата на шампионите, Лига Европа и во квалификациите за Европски и Светски првенства.
По завршувањето на активната судиска кариера, работеше како контролор на судење под капата на УЕФА и ФИФА. Во ФФМ, веќе има извршувано значајни функции – беше претседател на судиската комисија, одговорен за развојот и едукацијата на судиите, организација на семинари и примена на нови технологии.
