Македонскиот тенисер Горазд Србљак продолжува со одлични настапи на меѓународната сцена. Со две победи во квалификациите на ИТФ турнирот во Куршумлијска Бања (Србија), Србљак обезбеди пласман во финалето на квалификацискиот циклус и е на само чекор од настап во главната ждрепка.
Во денешниот меч од второто коло, Србљак во драматичен дуел го совлада домашниот претставник Астро Пилиповиќ со 2-1 во сетови (6-2, 4-6, 10-2 во тај-брејк суперсетот). Македонскиот тенисер покажа ментална стабилност и борбеност, особено во клучните моменти од мечот.
Претходно, во првото коло од квалификациите, Србљак беше поуспешен од Аргентинецот Валентин Гуадањо, кого го победи со сигурни 2-0 во сетови (6-3, 6-3), демонстрирајќи сигурна игра од основната линија и стабилен сервис.
Во утрешното финале од квалификациите, Србљак ќе се соочи со првиот носител Аристарих Сафонов, во меч кој ќе одлучи кој ќе се пласира во главната фаза на турнирот.
Ова е одлична можност за македонскиот тенисер да направи уште еден исчекор во кариерата и да го продолжи својот продор на ИТФ турнирите.
