Одбојкарскиот клуб Пелистер Волеј од Битола официјално го промовираше своето најголемо летно засилување – Симона Стојановска, една од најискусните и најуспешни македонски репрезентативки, се враќа во матичниот клуб.
Станува збор за одбојкарка со богата кариера и големо меѓународно и домашно искуство, која доаѓа од редовите на шампионот Јанта Волеј КВ, со кого ја освои титулата оваа сезона, како и двојната круна во сезоната 2020/21. Со нејзиното враќање, Пелистер добива лидер со јасна мисија – враќање на битолската одбојка на највисоко ниво.
Стојановска е прва сениорска репрезентативка од Битола, а зад себе има настапи на Медитеранските игри во Алжир (2022) и Сребрената Европска лига (2023 и 2025). Нејзините клупски успеси вклучуваат четири финалиња во Првата лига и Купот на Македонија, како и избор за трет најдобар спортист на Битола во 2019 година.
Ова засилување е дел од пошироката стратегија на клубот за подигнување на квалитетот и создавање конкурентна екипа, проект кој е поддржан од Општина Битола. Претходно, клубот го најави и доаѓањето на Шиник Никол Мекги, а најавени се и нови трансфери во следниот период.
„Станува збор за една од најискусните одбојкарки со богата играчка кариера и долгогодишна репрезентативка на Македонија со огромни успеси зад своето име. Симона која одбра да се врати во својот матичен клуб и несомнено ќе биди една од лидерите на екипата со новото лице, на битолски Пелистер, е нешто што ветувавме дека ќе го направиме уште на самиот почеток“, велат од клубот.
