Во новата сезона 2025/2026 во Третата македонска фудбалска лига – Југ ќе се натпреваруваат 14 екипи, ексклузивно дознава Спортска Мрежа.
Овој број на екипи учесници за новата сезона е конечен, а во следната сезона ќе има два нови третолигаши. Се работи за Млекар од Мало Коњари кој доаѓа од ОФС Прилеп и Тополка од велешката населба Превалец од ОФС Велес.
ОФС Кавадарци и ОФС Неготино не предложија клубовите за натпреварувачката 2025/2026 сезона дознава Спортска Мрежа.
Дополнително според нашите информации на состанокот на Трета лига – Југ е донесена одлуката да нема испаѓање од лигата, бидејќи два клуба предвреме се откажаа од натпреварувањето минатата сезона односно Марена и Обршани.
Во новата сезона ќе се натпреваруваат седум екипи од ОФС Прилеп, а тоа се Питу Гули од Крушево, Младост 1930 од Кривогаштани, Ултрас од Прилеп, Бучин од село Бучин, Слога 1976 од Лажани, Влазними Јуниор од село Пресил и Млекар од Мало Коњари. Од ОФС Велес ќе се натпреваруваат четири екипи, тоа се Борец 1919 од Велес кој испадна од Втората лига, Башкими од село Јаболчиште, Превалец од населба Превалец и Тополка о населба Превалец. Од ОФС Кавадарци се поранешниот второлигаш Росоман од општина Росоман и Дреново 2016 од село Дреново, а од ОФС Неготино е Венец од Долни Дисан.
Новата сезона ќе започне на 7 септември (недела), ќе се игра само во недела, а есенскиот дел треба да заврши на 30 ноември 2025 година.
Ждрепката за распоредот на натпреварите е закажана за 25 август во просториите на ОФС Кавадарци со почеток од 18:30 часот.
