Екипата на Форца од Куманово по втор пат по ред ќе ја претставува Македонија на меѓународната сцена во УЕФА Лигата на шампиони во футсал, откако ја потврди својата доминација на домашен план и повторно се закити со двојната круна – титулата во Првата футсал лига на Македонија и Куп титула.
Под водство на тренерот Газменд Хисеини, Форца ќе биде дел од прелиминарната рунда во новата сезона од Лигата на шампиони, а оваа година дополнително признание за македонскиот шампион претставува веста дека Куманово ќе биде домаќин на еден од квалификациските турнири. Натпреварите ќе се играат од 26 до 30 август 2025 година во спортската сала во Куманово.
На денешната ждрепка одржана во седиштето на УЕФА во Нион, Швајцарија беа извлечени групите за прелиминарната рунда, а Форца Куманово се најде во Група А, заедно со: Ереван од Ерменија, Енкамп од Андора и С.С. Мурата од Сан Марино.
Македонскиот шампион ќе има предност поради домашен терен, што ќе биде дополнителен мотив за пласман во следната фаза. Учесниците во групата се прваци на своите национални првенства, што гарантира квалитетни и возбудливи натпревари.
Со одличната форма и силната поддршка од публиката, Форца ќе се обиде да ја оствари главната цел – пласман во главната рунда на Лигата на шампиони и да испише нова златна страница во историјата на македонскиот футсал.
„Ждрепката на прв поглед изгледа во наша корист. Главниот натпревар ќе биде со тимот од Ерменија. Нашата предност е што за првпат ќе играме во Куманово, пред нашите навивачи во спортската сала и мислам дека сепак ќе се квалификуваме за главната рунда“, изјави тренерот Хисеини.
