Машката одбојкарска репрезентација на Македонија до 19 години ќе настапи на Балканскиот шампионат (БВА) кој ќе се одржи од 9 до 13 јули во Бања Лука, Босна и Херцеговина. Нашите млади одбојкари ќе се натпреваруваат во групата А, заедно со селекциите на домаќинот Босна и Херцеговина, Турција и Романија.
Во групата Б се наоѓаат репрезентациите на Бугарија, Грција, Србија и Црна Гора.
Организаторот веќе го објави распоредот на натпреварите кои ќе се играат во спортската сала „Борик“ во Бања Лука. Македонија го започнува шампионатот на 9 јули против Босна и Херцеговина, во последниот термин од денот – со почеток во 20:30 часот. На 10 јули, од 15:30 часот, нашите надежи ќе се соочат со селекцијата на Романија, а групната фаза ќе ја затворат на 11 јули со натпревар против Турција, исто така во терминот од 15:30 часот.
Во зависност од пласманот во групата, на 12 и 13 јули ќе се играат полуфиналните средби, како и натпреварите за конечниот пласман, вклучително и финалето на шампионатот.
Нашата селекција со голема мотивација и амбиции ќе се обиде да остави силен впечаток на балканската сцена, покажувајќи го својот потенцијал и борбеност. Очекувањата се насочени кон пласман меѓу најдобрите и достојно претставување на македонската одбојка.
